ARUSI MAJUU…

Arusi za Waafrika Majuu huwa zina ugumu na urahisi wake.

Ugumu?

Mwafrika kuwa mbali na jamii na jamaa zake; akibahatika kupata wahudhuriaji wachache basi humshukuru Mungu. Ugenini ni ugenini tu…

Urahisi?

Ile furaha isiyopatikana kirahisi kutokana na kuishi ughaibuni  kama mgeni, huvimba, ikanepa na kuringa : raha ya kufanya kitendo maalum.

Karibuni nimehudhuria arusi mbili kem kem. Mosi,  ya  dada toka Kenya, Nyambura aliyeolewa na Mjerumani Thomas Munz;  mji mdogo wa Neunstadt, Heilbronn  katika jimbo lililo kusini ya nchi hii , yaani Stuttgart.

Picha juu imepigwa na binamu yake bi arusi, Patrick Maina.

Arusi ya pili ilikuwa mjini London mwanzo wa Septemba.  Msanii na mcheza ngoma (mi humwita “Manju”) toka Bongo,  Tom Chiwalala alifunga pingu za maisha na Mtanzania mwenzake, Pauline ( pichani chini wakitosa champaigne). Pati  yao bab kubwa  ilihudhuriwa na mamia ya ndugu na marafiki wa kila rangi, umri na taifa.

Tukala, tukanywa, tukacheza, tukasaza.

Zamani Babu yangu mchungaji Macha alipenda kusema binadamu hupitia mambo matatu muhimu : kuzaliwa, arusi na kifo. Vya mwanzo na mwisho huwa hatuvitambui, ila arusi sio? Kiboko.

Oa, olewa au kama  unasheherekea tu vya  wenzio hii ni nguzo kuu ya uhai.

Tuwatakie maharusi maisha mema na marefu….

MPYA ZA MUZIKI UGHAIBUNI

RAS NAS  ZIARANI NORWAY 2009

Mwanamuziki mkongwe wa miondoko ya rege na muziki wa dansi mwenye makao  Oslo, Norway, Ras Nas ( Nasibu Mwanukuzi),  anapanga safu kali kwa ajili ya ziara ya miji sita Norway. Ziara hiyo itakayoanza Kongsberg tarehe 23 Oktoba itamalizikia jijini Trondheim 7 Desemba.

Kikosi cha Ras Nas kinachanganya wanamuziki toka Congo Brazzaville, Ivory Coast, Norway na Marekani. Wabongo wa Norway habari ndiyo hiyo!
Mwezi wa Desemba Ras Nas na bendi yake watatembelea miji ya Galle na Colombo Sri Lanka kuwasilisha Norway, ( watapita Tanzania pia) katika tamasha la muziki.

Kwa habari zaidi fuatilia http://www.rasnas.kongoi.com.

MJADALA WA MJENGWA KUHUSU “UTANZANIA”

Mjadala aliopopoa Maggid ” Mwenyekiti”  Mjengwa (pichani, kulia, alipohudhuria semina zangu,  Dar, Mei)  blogu ya Kwanza Jamii umezua maoni kem kem.  Ni mjadala muhimu kwa sababu kadhaa:

1-Zamani Mwalimu Nyerere alisisitiza sana juu ya utaifa ndiyo maana akashauri sote tuongee Kiswahili. Hii imechangia sana kutokuwa na kero za ukabila Tanzania kama zilivyo nchi nyingi bara Afrika. Hatujawa na vita vikubwa vya wenyewe (ukiacha kumtoa Amin, 1979) tangia 1907.

2-Kizazi kipya cha Watanzania kilichopumua hewa baada ya  Mwalimu  (Ujamaa) kimeanza “kukua na utata” wa kutojijua wewe nani (identity) hili linaonekana mathalan katika masuala ya lugha.  Lugha ni kitanda kikuu cha mawasiliano na utamaduni. Wachache sana leo wanaweza kuandika au kuongea Kiswahili fasaha au Kiingereza fasaha bila kuchanganya maneno.  Tatizo hili limeenea Afrika nzima. Wazaire,  kwa mfano wakiimba au kuongea utakuta sentensi zimechanganya Kilingala na Kifaransa. Wakenya hivyo hivyo. Afrika Kusini hivyo hivyo.

3-Hata wale wanaondika Kiswahili utakuta wanachanganya herufi L na R  ama  DH na Z .

Mathalan : “luka” badala ya “ruka”;  ”luninga” kinyume cha “runinga”; “azabu” badala ya “adhabu” nk. Hili ni tatizo kubwa sana na linaonekana wazi wazi  ndani ya mablogu, vyombo vya habari, simu za mkono (SmS) , nk.

4-Mfano bab kubwa wa karibuni ni malumbano na mgogoro kuhusu mwigizaji  Steven Kanumba, alipokuwa katika Big Brother Afrika, anadaiwa na baadhi eti hakuongea Kiingereza fasaha (ingawa suala ni la lafudhi na nahau kuliko sarufi) na  alikosea alipotoa zawadi ya shati rangi ya waridi – pink- (ambayo ni rangi ya Wasenge ughaibuni) badala ya kutoa kitu cha jadi kama vinyago,  kanga, miziki ya Watanzania nk.

Mambo kama haya ya utoaji zawadi kutoka kwenu….(mila na desturi) hutokana na kujijua yaani “identity” anayoongelea Mwenyekiti Maggid.

Hebu angalia maoni chini:

http://mjengwa.blogspot.com/2009/09/watanzania-hatuna-kwetu.html#comments

Wimbo wa “Dar es Salaam” unaotingisha Majuu (Skandinavia)

Nasibu Mwanukuzi au anavyojulikana kwa jina la kisanii, Ras Nas…katoka na kibao ambacho pia ni  jina la Albam yake ya pili kinachoutukuza na kuughani mji wa  Dar es Salaam karibuni.

Moja ya magazeti  makubwa nchini humo: Dagsavisen liliipa albam hiyo nyota tano. Nyota tano si mchezo kwa mwanamuziki wa Kiafrika anayetumbuiza Uzunguni.

Niliwahi kufanya kazi na Nasibu Mwanukuzi tukiwa katika bendi ya “Sayari” mjini Dar es Salaam kati ya 1981-84.  Ni mtu mwenye vipaji vingi. Anachora, mwanamichezo, mwandishi wa habari (alifanya kazi Daily News na Africa Magazine) pia kasoma si kidogo. Ana shahada  ya sheria (Chuo Kikuu cha Dar, 1984) na shahada ya Mawasiliano chuo kikuu cha Oslo (1985).

Kawahi pia kutoa mkusanyiko wa mashairi ya kiingereza (Double Focus, 1989) …ndani ya kitabu mna utenzi aliomtungia Mzee (Madibo) Nelson Mandela, na aliutongoa  na muziki wakati Madibo alipotembelea Oslo baada ya kutoka jela mwaka 1992.

Usikilize wimbo  huu wa  Dar es Salaam:

Nasibu ni kati ya Watanzania wenye moyo was kujituma na mchapa kazi halisi. Mathalan moja ya mengi anayonikosha nalo ni hili. Wakati tukiwa  Sayari alikuwa mpiga ngoma, mwigizaji, mtunzi na mwimbaji.  Leo hayo yashaongezeka zaidi. Leo licha ya kutunga nyimbo za Kiswahili (kama zilizomo katika albam yake ya awal, “Cut It Loose” iliyotoka 1997) anacharaza gitaa kama mnavyomwona juu….

Inatia moyo sana kuwa na Wabongo kama Ras Nas.

Ukitaka kujua au kusoma habari zaidi  hebu tembelea tovuti yake motomoto  :

http://www.kongoi.com.

KONGAMANO LA WANABLOGU BONGO DESEMBA

JIANDIKISHE HARAKA….

Je wewe ni mwanablogu (Blogger) au mdau wa habari na mawasiliano kwa umma kwa kutumia mtandao? Kama jibu ni ndio, tafadhali unaombwa kujiorodhesha kwa ajili ya maandalizi ya Kongamano Maalumu la Kitaifa kwa ajili Wanablogu (Bloggers) na wadau wa habari na mawasiliano wa Tanzania (Tanzanians Bloggers Summit) linalotarajiwa kufanyika Desemba mwaka huu jijini Dar-es-salaam,Tanzania.

Dhumuni la kongamano hili ni Kuelimishana, Kufahamiana, Kuamsha Utambuzi Rasmi Kuhusu Tekinolojia ya Blogu na Mawasiliano ya Umma kwa Kutumia Mitandao, Kusaidia Utambuzi Rasmi juu ya mchango wa blogu nchini Tanzania kama chombo muhimu cha habari na mawasiliano, Kuelimishana jinsi gani blogu zinaweza kutumika katika kuleta maendeleo katika nyanja za kijamii, kisiasa na kiuchumi, kuburudisha, kukuza utamaduni nk.

Wataalamu mbalimbali kutoka ndani na nje ya nchi wataalikwa kutoa mada na mafunzo mbalimbali kuhusiana na tekinolojia ya kublogu, zana nyinginezo za mawasiliano mtandaoni kama vile mitandao jamii(social networking), online forums nk.Kutakuwa na vipindi vya maswali na majibu.

Ili kufanikisha maandalizi ya Kongamano hili la kihistoria, kujiorodhesha kwako ni muhimu sana. Muda wa kujiodhoresha ni kuanzia tarehe 12/8/2009 (Jumatano) mpaka 12/9/2009 (Jumamosi) tu.

Kinachohitajika ili kujiandikisha ni :

Jina Lako, Anuani yako ya barua pepe (E-mail), Mahali Ulipo au unapoishi (Nchi,mji nk),Namba ya Simu (sio lazima) na Anuani au URL(Universal Resource Locator) ya blogu yako (mfano www.kongamano.blogspot.com/wordpress.com/.com/typepad nk). Vyeti vya Ushiriki vitatolewa kulingana na habari utakazoziorodhesha hapa.

Unaweza kujiorodhesha kwa kutuma ombi lako kwa barua pepe kwenda :

summit@bongocelebrity.com.

Zingatia tarehe za kujiandikisha.

Ni mwezi mmoja tu! Asante kwa ushirikiano. UMOJA NI NGUVU!

MAZINGIRA YETU : Ubaya na Uzuri…

Jamii zetu zinazoendelea zinahitaji sana Elimu.  Elimu itakayotusaidia kupambana na maadui kama : kutojua kupanga muda (Time Management) tatizo linalotufanya tuchelewe, tusiwe na mpangilio wa maisha ; halafu, kutoyajali mazingira yetu (vyoo vichafu na kutupa taka ovyo).Wataalamu wameshatuonya kuwa makaratasi ya plastiki tunayoyaacha kiholela kila mahali (yenye madawa hatari) yanaharibu rutuba na uhai ; yatakaa ardhini miaka 500 !!!

Si mbali  na palipotupwa plastiki hizi pana hoteli hii marufu na nzuri ya Silversands ambapo watalii na wenye uwezo wanakaribishwa kwa maua  mazuri yenye asili ya Kimarekani yaitwayo Bougainvillea.  Ikiwa tunaweza kuyapamba mazingira ki-azizi,  hatushindwi kuyaacha safi…

Nilishangazwa nilipoelezwa na muuza madafu mmoja Dar kuwa kinywaji (chakula) hicho muhimu siku hizi hakipatikani kirahisi. “Minazi inakatwa ovyo…” akalalama. 

Nilipokuwa kitongoji hiki cha Dole, Unguja, nikawa nawaza lile balaa la minazi kukatwa bandari  ya Dari Salama. Minazi imesimama dede mithili ya twiga au mbuni malishoni.  Je, itadumu? 

  Sehemu nyingi Zanzibar bado vyakula asilia vinathaminiwa. Cheki  matunda, mboga na makulaji : mjini na vijijini. Ama kweli inatia moyo…maana chakula ni utamaduni wa nchi; kama huna au unaiga (huthamini chako) huna jicho…

Huku unakula huku unafikiria namna ambavyo bado wananchi wengi tunatupa chupa za maji ovyo nje; tunavyofungia bado vyakula vyetu kwa magazeti badala ya mifuko isiyokuwa na sumu na madawa… 

Kinamasi hiki kimejaza si tu plastiki  na dawa zenye sumu bali pia wadudu kama mbu. Kila anayeweza (kutumia mtandao na kompyuta ni uwezo na nafasi) kuelemisha watu wetu ajitahidi na kujaribu…maana hizi blogu hazisomwi na wengi.

Hapa natia tizi katika moja ya bichi za Dar…ukweli si rahisi siku hizi kupata ufukwe msafi mjini hapa. Na hata zile safi baada ya kuogelea unahisi macho yakikuwasha washa. Watalaam wameonya kuhusu kutupa taka ovyo baharini, kunya (na kukojoa) ovyo ufukweni, kuchafua michanga kwa vyupa vya vinywaji tunapostarehe kando ya bahari mama ya Hindi.

SEMINA MBALIMBALI DAR ES SALAAM, MEI 2009

Zoezi maalum la kusaidia mabega kutokana na kazi mbalimbali zinazoathiri migongo, shingo na kichwa. Kuning’iniza bega moja ukizungusha mkono pande zote, huku mkono mwingine umeshika kiti au meza. 

Semina zilitayarishwa na jarida la LUCKY linaloendeshwa kwa ushirikiano wa wananchi wanaojitolea mhanga kuelemisha na kuendeleza jamii ya Tanzania.  Waliosimamia kazi hii ni Innocent Swai na mhariri wake Anna Rugaba. Zilifanyika Ukumbi wa British Council, Shule ya Sekondari Mwandege, Pwani; Nyumba ya Sanaa na Soma Cafe, Mikocheni.

 Nilialikwa kuendesha mada nne muhimu:

1-Maisha ya Ughaibuni : utamaduni, elimu, kazi, uzoefu nk.

2-Afya, Chakula na Mazoezi ya mwili na viungo kwa jumla

3-Uandishi, fasihi na umuhimu wa kusoma na vitabu

4-Muziki : utunzi, uimbaji, upangaji na sanaa

5-Kitabu changu “Mpe Maneno Yake”

Mazoezi ya viungo, Ukumbi wa Vijana wa Tayoa (Tanzania Youth Alliance) Nyumba ya Sanaa.

Zoezi la kunyoosha mwili linalotokana na mfumo wa Yoga unaolinganisha kiwiliwili na mti (Tree Pose). Manufaa yake ni kukupa mwili usiojipinda ili kupunguza maumivu ya mgongo, kiuno na mabega. Pia husaidia akili , moyo na ari.

Wanafunzi  waliojaa hamasa  Shule ya Sekondari Mwandege, baada ya semina waliyovumilia saa tatu nzima. Mseto wa muziki, fasihi, rapu, mazoezi nk. (Picha na H. Macha)

Washiriki mada ya Maisha Ughaibuni, ukumbi wa British Council, wakiandika hoja. Maswali na majadiliano yalikuwa mengi. (Picha na Innocent Swai)

Mazoezi ya shingo Shule ya sekondari Mwandege yenye vidato vinne (Picha na H. Macha)

Anna Rugaba wa  Lucky Magazine -Ideas for Living - lililotayarisha warsha hizi akisaidia washiriki kutoa maoni na mrejesho nyuma. (Picha na Innocent Swai)

 

Washiriki Soma Cafe : Asha Mtwangi  wa Futures Group (www. futuresgroup.com) linalohamasisha vijana, afya na tamthiliya akiwa na Shanande Mushi…

Mshiriki na mtayarishaji Anna Rugaba wa Lucky akijaribu zoezi la kujinyoosha la Yoga mtindo wa Paka (Cat pose) ambalo husaidia viungo vingi ukiwemo mgongo, tumbo, miguu, mikono, mabega, mapigo ya moyo, kizazi na akili.

Waliohudhuria semina Soma Cafe ambapo suala la kusoma vitabu linafanyiwa kazi na kampuni ya E & D Limited pale Mikocheni. Kushoto ni Asha Mtwangi na kulia ni mwandishi chipukizi,  Shanande Mushi.

 

Innocent Swai wa Lucky Magazine- Ideas for Living- akiwa na viongozi wahamasishaji wa Tayoa (Tanzania Youth Alliance) wanaosaidia magonjwa ya zinaa katika Nyumba ya Sanaa.   Hawa walitukaribisha kwa mikono yote wakatupa ukumbi bure siku tatu. Katikati ni Meneja Mawasiliano, Benedicto Luvanda, mchapa kazi aliyehakikisha shughul hii inafanikiwa toka mwanzo hadi mwisho.

Kati ya wanafasihi wenye uzoefu mkubwa nchini ni Profesa Muyagbuso Mulokozi aliyehudhuria semina ya Soma Cafe. Baada ya kuwaeleza vijana kuwa mtaalamu huyu alikuwa kati ya wahamasishaji wangu wakubwa nikiwa naanza kuandika miaka ya Sabini  baadhi walikaa wakimsikiliza. Hapa Prof Mulokozi anatoa store kuhusu gwiji wa fasihi ya Kiswahili Shaaban Robert.

Mwanamuziki mkongwe, Ibrahim Boss, aliyekuwa zamani mpiga ngoma (kit drums) bendi ya Revolutions (Kilimanjaro Hotel) miaka ya 80 alikuwepo Soma Cafe. Alisaidia pia kuchangamsha ngoma wakati  nikitumbuiza kwa gitaa na nyimbo.

Mwalimu Mkuu wa Shule ya Mwandege Boys, Bw. Enock Walter na baadhi ya wanafunzi viongozi. Shule hii isiyotumia kengele ni kati ya shule za kipekee nchini zinazotoa elimu inayowatayarisha wanafunzi kuwa makini zaidi kinidhamu, kitabia na kiakili.

Nyumba ya Sanaa…

Muziki wa gitaa, mashairi na fasihi

Majadiliano kuhusu fasihi, maisha ughaibuni, afya; maswali na majibu:  Nyumba ya Sanaa…

BONGO YA KUUGUZA NA KUKUTIBU…

Karibuni nimeingia tena Bongo baada ya miaka miwili. Ama kweli kwa tunaoishi ughaibuni kurudi nyumbani ni kama kwenda hospitali. Kabla ya tiba lakini, shurti  kuujua ugonjwa.

Tiba ya kwanza utani, masihara na vicheko.  Hapa tuko Nyumba ya Sanaa (iliyofunguliwa na Mwalimu Nyerere mwaka 1983); leo imegeuzwa Jumba La Kila Kitu : baa, kamari, michezo, hoteli, mahali pa watalii kununua vito vya Tanzania, makutano kwa walioko mjini; kuchaji simu za mkononi, kutazama mpira mathalan ligi za Ulaya; sehemu ya kufanyia mazoezi na maonyesho.

Niko na Al Watan,  baada ya kuchapa nyama choma kwa ndizi choma na vinywaji.  Kwanza kabisa ni Innocent Swai mhamasishaji, mjasiriamali na mwendeshaji wa jarida jipya la “Lucky”;  kushoto kwangu ni Issa Michuzi  mpiga picha na mwanablogu maarufu siku hizi. (Picha na Blandina Kilama)

….Tiba ya kwanza ukirudi nyumbani ni vicheko. Unafurahia usiowaona muda mrefu.  Swali la kwanza: je, utacheka  muda gani?

Barabara itokayo Magomeni kwenda Ilala; hapa kuna mfano mzuri wa jiji la Dar leo. Magari makubwa makubwa aina zote : Pajero, Prado, nk. Barabara zilizopanuliwa; mioshi ya magari na vumbi; hapo hapo huyu bwana mgongo wazi akivuta mkokoteni  (kwa baiskeli) akitafuta ajira. Mbio za mapanya zimeingia Bongo kiasi wahisi kila kitu mwendo mkali… 

(picha ya mdau wa Kitoto)

Wimbo wangu …Freedom

Karibu  ndani; karibu chakula….sikiliza  moja ya nyimbo zangu penzi unaoongelea  namna mbalimbali za Uhuru; … na jinsi Uhuru ulivyo muhimu kuliko kitu kingine chochote duniani.

Niliutunga mwaka 1980 wakati  bado naishi “geto” moja pale Mwananyamala Kisiwani, Dar es Salaam.  Usiku nilioupika sikulala kutokana na kilio cha mwanamke aliyekuwa akikandikwa makonde,  mateke, matusi na mumewe aliyemkuta kaomba Sabuni toka kwa jirani sababu ya hali ngumu ya uchumi. Ongeza pia kwamba kipindi (enzi hizo) hakukuwa na uhuru wa kusema au kujieleza kama leo….

Wanaopiga nami kushoto piano -Kaz Kasozi ( Uganda) ;  besi- mdau mwenzangu wa Kitoto, Andre Mathurin (visiwa vya St Lucia); tumba (congas) -Trevor Antonio mwenye asilia ya Kiafrika na Kijamaika.

Aliyesimamia kazi hii ni Kaz Kasozi mwenyewe akishirikiana na  Krawl (kamera): marafiki na ndugu katika muziki, maudhui na sanaa….

Kasozi ambaye ana vipaji vingi alikuwa pia fundi mitambo wa CD yangu ya mwaka 2000 : “Constipation…”

MJUE MHAMASISHAJI- Innocent Swai na jarida la LUCKY

“ELIMU HAINA MWISHO…”

Methali ya Kiswahili

 Nchi yetu ina utata.

Mheshimiwa Rais kachorwa vibaya mitandaoni; miezi kadhaa iliyopita akazomewa ilhali kachaguliwa kwa asilimia 80 ya kura; Rais wa zamani, bwana Mwinyi akapigwa kofi hadharani; ajali za mabasi zimezidi,uvutaji bangi (hasa miongoni mwa vijana) umefikia asilimia 90 sehemu fulani fulani; viongozi mafisadi mahakamani; utovu wa nidhamu unaiandama nchi yetu ya Tanzania.

Tumeshasikia Muziki wa Kizazi Kipya ; tunahitaji pia Mawazo ya Kizazi Kipya: Wachapa kazi wa Kizazi Kipya; wananchi wenye nidhamu na mwenendo utakaodumisha amani na maendeleo ya Tanzania.

 

…Tulitazame jarida jipya la Lucky, lililoanzishwa karibuni mjini Dar es Salaam.

Mhamasishaji Innocent Flugence Swai,  (pichani) mwalimu wa kompyuta, mjasiriamali, msomi anayeamka saa kumi na moja kila siku alikuwa na  haya machache…

 

FM:

Je  magazeti yanawezaje kusaidia changamoto na maendeleo ya Mtanzania? 

 SWAI:

Ninaamini kwamba majarida kama Lucky! Yana uwezo wa kuleta mwamko. Ni rahisi sana kulaumu, kulaumiwa na kulaumiana. Lakini tunaweza kujenga mawazo mbadala…

 FM:

Jarida lenu  lina makala za mseto. Ipo  inayowaasa wanawake kutovaa sidiria zisizofaa, pana mahojiano na msanii Mrisho Mpoto halafu makala ya elimu yenye picha zenye watoto wakiwa darasani. Mmegusia pia tatizo la Ma Albino. Makusudio ni nini hasa?

 SWAI:

Tanzania ina matatizo mengi mno! Ni vigumu kwa ulimwengu huu wa sayansi na teknolojia kugusa tatizo moja,  ndiyo maana tunaweza kuwa na malengo tofauti tofauti huku tukigusa matatizo kadha wa kadha ili kila mtu na hitaji lake tofauti apokee kitu toka kwetu.

 

 

 

 FM:

Lucky pia  lina lugha mbili, yaani Kiswahili na Kiingereza. Mkondo huu umeanza sana kukua katika nyendo za majarida ya kisasa Bongo. Je ni muhimu?

 SWAI:

Ni muhimu, ni muhimu sana, manake ni jamii ambayo bado hatuna nguvu ya kumudu hizi mbili tu. Pia tunawalenga watu toka nyanda zote za jamii; hivyo ni muhimu kuhakikisha kila mmoja, mdogo kwa mkubwa pasipo kujali elimu, rangi, kipato, au itikadi anahamasishwa na jarida letu.

 

JITAFUTIE NAKALA YAKO YA LUCKY; UTAJIFUNZA LUGHA; UTAPATA HOJA MPYA; IKIWEZEKANA UNAWEZA HATA KUWAANDIKIA.

 “UJASIRIAMALI SI LAZIMA IWE KAZI YA MTU MMOJA AU WAWILI, BALI KUNA WAKATI AMBAO KUNDI LA WAJISIRIAMALI HUJIUNGA PAMOJA NA KUANZISHA KAMPUNI MOJA YENYE NIA MOJA.”

-Dk Imani Kyaruzi, Profesa Msaidizi Chuo Kikuu cha London Graduate School of Management.

 “KIPIMO CHA THAMANI YA MWANADAMU NI KIASI CHA FURAHA ALIYONAYO. AKIENDELEA FURAHA YAKE PIA HUWA KUBWA.”

-Bruce Lee, Mwigizaji sinema, Mpiganaji Gung Fu, Mwanafasalfa, 1963.